‘म सधैं श्रमिकहरूको पक्षमा छु, श्रमिकको अधिकारको पक्षमा उभिन प्रतिबद्ध छु, तर पार्टीभित्र अवसरवादीहरू पनि छन्, त्यस्ता अवसरवादीहरूदेखि सावधान रहनुहोला, म त सावधान भइसकेँ,’ नेता कोइरालाले भने, ‘तपाईंहरू पनि सावधान रहनुहोला ।’ उनले आफू पनि पार्टीभित्र संघर्ष गरिरहेको, तर आफूले चाहेको जस्तो गर्न नसकिरहेको बताए ।

‘म श्रमिकहरूलाई पार्टीमा मात्रै होइन, संसद् र सरकारमा पनि पुर्‍याउन, देख्न चाहन्छु, त्यसका लागि पहल गर्छु,’ उनले भने, ‘मैले यति गर्न सकेँ भने मलाई लाग्छ, मैले तपाईंहरूलाई न्याय गरेको ठहरिनेछ । म कोसिस गर्दैछ, प्रयास गर्दैछु । तर आफू नै त्यो सबै गर्न सक्ने ठाउँमा पुगेको छैन । म त्यहाँ भइसकेपछि मात्रै धेरै कुराहरू गर्न सकिने रहेछ । समय आउँदैछ, तपाईंहरूलाई पनि थाहै छ । समय आएपछि, ठाउँमा पुगिसकेपछि मैले गरिनँ भने तपाईंहरूले मलाई औंल्याउन सक्नुहुन्छ ।’

उनले मुलुकको राजनीति अफ्ठ्यारो अवस्थामा पुगिरहेको भन्दै अब सबै स्वार्थ छाडेर ‘राष्ट्र पहिला’ भनेर अगाडि बढ्नुपर्ने समय आएको बताए ।